Raphael Paglia

Liebe Raphael                                             25. Juli 2024

En Laudatio  hät ich sehr gern a dim Hochzit vorbereitet, aber  sicher ned en Lebenslauf jetzt, so wie ’s Schicksal das bestimmt hed.

Du häsch dis Läbe vo Afang ah bis am Schluss uskoschtet. Das Wort Angscht häsch du fascht ned kännt. 

Wiiter, höcher, intensiver, besser und schnäller sind Wort wo du gläbt häsch. Scho bi de Geburt, keini 3 Stund häsch du dir Zyt gla, dänn bisch du Sunneschy bi eus gsi und häsch üses Läbe i allne Belange beriichered.

Bim Schoppe drinke, au wänns wirklich kei Wettbewerb isch, du häsch din Schoppe fertig trunke bevor d,Fabienne, mit 2 Jahr meh Vorsprung, knapp bi de Hälfti gsi isch, also au da unbewusst, schnäller isch dis Motto gsi.

Was für anderi en Teddybär, hed dir dini geliebti Spieluhr, in Form vomene Stoffhund, bedüted. Du häsch ihn überall mitgno, au zum Spiele dinne oder dusse. Obwohl s’Grossmami zweimal de Stoffhund neu ikleidet hed, isch er nümme zum aluege gsi und isch vom Mami heimlich ersetzt worde. Das hesch du ihre bis hüt immer wieder spasseshalber vorgworfe. 

Biss hesch au scho frühe zeiget. Hät dich d,Fabienne gärgered und du hässig worde bisch, häsch en rote Chopf becho und sie welle bisse. Zum Glück isch sie, da no schnäller gsi… 

Am Drükönigstag hed Krone meischtens de Fabienne ghört, schwer z,begriffe für dich, du häsch gmeint, das chan ned mit rächte Dinge zuegah.

Verlüre bi Spieli hesch au scho früh ned eifach so chönne akzeptiere. Im Friede zlieb hend dich s’Mami und de Papi la gwünne, bis de Herbie i dis Läbe trete isch und den heds bi dene Spielregle, kei Pardon meh gäh.

Aber ernschthaft, häsch du dir öpis in Chopf gsetzt, isch es usprobiert worde und meischtens glunge. Öb das dini grossi Liedeschaft s,Fuessball gsi isch, oder Schlagzüg spiele, Tennis wo du dich gege Älteri, mit meh Erfahrig, dure gsetzt hesch.

Prüfige im Allgemeine hesch du problemlos absolviert, wie mit 18  scho Auto-Töff und Bootsauswis. 

Au Surfe, Kitesurfe, Wasserski, Wakeboard , Bungee Jumping, Fallschirm springe, Kickboxe alles hesch du usprobiert und mit vil Lidenschaft pflegt. Mit em Ring, bim Nachezieh mit em Boot, bisch du ned übers Wasser gleited, nei du bisch drüber gfloge.

Nur für wenige Sache, hesch dir unglaublich Zyt gla . Bim Spiele mit Chlämmerli und Actionman hesch dich stundelang chönne verwiile. Spöter sind Spiderman und Harry Potter dini Helde gsi. I dinere einmalige Art hesch du die Figure chönne immitiere, zelebriere und fantasievoll widergäh.

Ruhig uf dim Füdli sitze isch ned gange, usser bim Fische. Du häsch stundelang ufs Wasser und de Zapfe useglueget, au wänn kei Fisch abisse hed, da hesch du dich total chönne entspanne. En anderi Ruhephase hesch du dir bim Rüggechräbele vo allne dine Liebe gönnt.

Fasziniert bisch gsi vo Guggemusige, wo du au regigslos hesch chönne zulose, sogar während de Skischuel in Savognin. Ned emal verlockendi Gummibärli vo de Skilehrerin hend dich zum wiiter fahre chönne bewege.

Ihr sind scho als ganz Chlini  immer uf em See gsi. Ja und spöter, wie oft häsch du gseit, dass du die Ruhe uf em Wasser so unglaublich gnüssisch. Wie viel Stunde hend mir ali zäme , du mit de Fabienne , mit dim Schatz oder mit Fründe uf em Boot verbracht … Au wänns ned wirklich chan tröschte, isch es doch irgendwie schön zwüsse, dass de Platz vo dim Grab en wunderschöne Blick uf din geliebte Zugersee hed.

Oft hesch du i dim Läabe es Schutzengeli gha. 

Als 1 Jährige bisch mit em Autöli, wo mer mit de Füess ahgitt, immer dur d,Stube, Chuchi, Gang gflitzt, immer schnäller, bis du uf em glatte Bode im Gang usgrutscht und d,Stäge abegfloge bisch. Als Folg devo, mir händ mit dir in Spital dörfe und dini Platzwunde am Chopf go näihe.

Mit 2 Jährig hesch du dich bim Grossmami und Grosspapi is Spielzimmer igschlosse, de Schlüssel versteckt und de Schlosser hed denn dörfe en Sunntigsisatz leischte.

Im Tessin, du bisch noni 3, wotsch bim Pool über d, Blache laufe, die sinkt aber i, schwümme chasch noni. Zum Glück hät d,Fabienne gschraue, wie no nie, mir sind zu dir grännt und händ dich chönne use zieh.

Am nächschte Tag han ich de Pool putzt. Du bisch au am Poolrand umegloffe, gheisch is Wasser, tauchsch under und wo ich dich am Arm ufezieh, anderi würdet brühele, du lachsch mich a und findsch es luschtig.

Uf em Schlitte, wo anderi Chind sitzed und die wildere büchligs ligged, häsch du s,Gfühl gah, me cha ja au druffe stah. Ja chammer aber halt numme churz. Du häsch dir s,Schlüsselbei broche.

Und das sind nur es paar Gschichte wo du eus allne es paar graui Haar und Närve koschted häsch.

Apropos Närve, Nastüechli Päckli wo dir s’Mami agrüehrt hed, nachdem du x-mal die glich Frag gstellt hesch bi de Husufgabe, gaht ned, wie vo dir erwähnt, under Misshandlig. 

Uf de andere Siite händ du und d,Fabienne gli gmerkt, dass ihr en ganz en bsunderi Verbindig händ.

Die letsche 3 Jahr händ ihr sogar zäme gwohnt…. Welli Gschwüschterti chönnd und mached das?

Uf em Spielplatz, wänns mal striit geh hät mit andere Chind,  und das ned nur wäge de andere, sind ihr immer grad zäme gstande.

Bim Fuessball sind ihr lang i de gliche Mannschaft gsi. Du, damals im Sturm, d,Fabienne i de Verteidigung.

D,Fussball-Lideschaft hesch du in Hünenberg gstartet, bis s,Mami und de Herbie im 2006 uf Unterägeri züglet sind. I de FC-Aegeri Familie bisch du sehr schnell als Talent ufgfalle. Mit grosse Schritt ischs über Zuger Talentmannschafte vo de U11 bis id U21 vom FC Luzern gange. Im Rahme vo de SRF Sendig „Job-Tausch“ hesch du als Fussballer dörfe mit dim Kolleg Marc uf Rio de Janeiro reise und i de Favelas trainiere. Es isch en sehr prägendi Wuche gsi für dich.

Parallel dezu hesch du die 3. Sekundarklass in de Sportschuel von Kriens und aschlüssend die 4 Jährig Vinto KV-Lehr bi de Gmeind Cham absolviert.

Nachher isch es brueflich id Privatwirtschaft gange. Zerscht bi de Axians in Rotkreuz und nachher als Immobiliemakler bi de Best Property in Zug.

Wie oft händ ihr beidi eus alli mit euchere offene, mängisch überdreite Art und überschüssige Energie zum Lache aber au es paar Mal zur Verzwifflig bracht. Als Bispiel, chönd au Nachbare in Savognin es Liedli devo singe. Einisch churz vor Mitternacht, sind sie cho lüte und hend gfragt öbs echt au mit echli weniger Ramba Zamba gahd.

Aber du hesch d‘Lüt au chönne zu Träne rühre. Am 50 Geburi vom Herbie häsch du mit 12 en eigene Text gschriebe zur Melodie Ewigi Liäbi.

Es wäre schön, mir chönted dir hüt nume en Bruchteil vo dene Emotione zrugg gäh, womer denn empfunde händ.

Wänn du eus allne vo dini Stories und Erläbnis verzellt häsch, isch das so lebhaft und lebändig überecho. Mir hend s,Gfühl gha mittendrin und  selber debie z,si. Du häsch eus sehr vil zum Lache bracht.

Jetzt mit fascht 27. bisch du en gschtandne Maa mit klare Ziel und Vorstellige gsi.

Grad aktuell gsi, uf d,Vermarktig vo mim Huus uf Dütsch und englisch, mit potentielle Mieter sind sehr positivi Rückmäldige zu dinere Person cho. Das hät mich unglaublich stolz uf dich gmacht und han dir das au no gseit.

Ja, s,Hochzyt vom Niggi, drü Tag vor dim tragische Tod, isch au für eus en wunsderschöni Erinnerig. Werum?

Vo dir, im Gägesatz zu de Fabienne, gits nur wenig Bilder. Die Föteli zeiged eus de Raphael, wie er gsi isch, gsellig, ufgstellt und fröhlich. Neui Bilder wird,s leider nie meh gäh..

Es gäbti no soo viel vo dir z,verzelle. Vieli vo euch wo da sind, chönnt das bestätige und schmunzle, will euch viellicht au grad öbis in Sinn cho isch.

Mir, d,Familie mit Julia wünsched eus, dass ihr, wo de Raphael kännt händ, ihn genauso in Erinnering bhaltet, wie er gsi isch.

En Läbemänsch wo alli häd chönne mitriisse, zum Lache bringe und begeischtere.

Liebe Raphael, mir danked dir für die viel z,churzi Zyt wo mir zäme händ dörfe erläbe.

D,Gab vo de Phantasie hät mir immer meh bedüted, als gsicherets Wüsse.

Albert Einstein 

Bis irgendwänn,  mir gsend eus wieder 

Mier säged nur no…. Ewigi Liäbi

Unseres Beileid an die Familie und Angehörigen, wir wünsche Licht und Liebe und sehr viel Kraft.

Mein herzliches Beileid an die Familie und Angehörigen, ich wünsche Licht und Wärme, Liebe und Kraft.

Fassungslos, traurig und sprachlos  :-( 

Ich wünsche allen viel Kraft in dieser sehr schweren Zeit.

Mein Beileid unfassbar traurig 😭