Nadine Lauper-Cueni

Liebi Nadine (Nana) euses Röseli

Hött hesch Gebortstag. Im Innere ghöre mer Dis fröhleche Lache. Du hesch (gliebt) und liebsch Din Gebortstag. 

Mer alli vo eus send hött ide  Chele gsi Dir zum höttige Freudetag es Cherzli goh azünde. Us Demuet und Dankbarkeit Dir zum Gebortstag. Nadine Du besch för eus Alles! För das hesch so veli grossi Füessabdrück hinderloh. Meh getz doderzue nömme z'säge. Alles esch längstens gseid und gschrebe.

Das do esch euse letschti Itrag. Well sowieso jedes Härz und jedi ewigi Liebi sone Siite überduuret. 

Mer höre do uf met Dim Gebortstag. Das esch der Afang. Und de 24. Mai 2018 esch ned s'Endi gsi. 

Jetz zünde mer no do Diheime Dir es paar Gebortstagscherze a. Blos sie us und wünsch Dir öpis ... ;-).

Mer send nor en Wimpereschlag do uf dere Erde. Gmässe a Allem. 

I dem Sinn wart uf eus wie mer's abgmacht händ. 

Egal wer vo eus werd ergendeinisch selle goh - er oder sie fallt direkt in Dini Arme.

... und dä Blick in Dini Auge werd zu atemlosem Heicho.... . 

Zmetz is Härz.

Bes denne.

Ufwiederluege i de Heimat euses über alles geliebte Röseli

Palmsonntig.

.... ha hött welle Videos aluege. Has ned gschafft. Weisch no Mani Matter und Palme binde... . E heili Wält. Och Liebs. Mini Träne flüsse in Ströme. Be i zwöi Teili teilt. Es goht  ned om mech. Das weiss ig.Vermisse Dech eifach soooo fescht! För das getts kei Wort. DU fählsch! Die Truur esch wiene schwäre Mantel zmetzt amene schöne Früehligstag wie hött.

Weisch no: Wohin soll ich mich wenden, wenn Gram und Schmerz mich. drücken? Wem künd ich mein Entzücken, wenn freudig pocht mein Herz? Ohni dä chönntsch mech vergässe ... ,-).

Vermisse Dech wie ig Dech liebe. Onändlech.

Mis geliebte Nadineli mis Röseli

Wie vermiss ig Dech! Kei Wort getts för das Loch i mim Härze. Jo Du besch ome ig weiss es. Nor: be au nor Mönsch. Wenn ig mech i dä Verluscht  vo Dir voll wörd inegäh - ig gloube - mech wörds uf de Stell usehaue... . DAS hesch mer aber ned eso vorgmacht und bibrocht. Vermisse Dis Lache und lächle. Und no soooo veles meh! Während 15 Mönet Kampf; unzählige Chemos, unzählige Bestrahlige, unzählige Klinikufenthalte,  vele vele OP's, inkl. Ghirntumor und dene mönschlech ned ushaltbare Schmärze!!! hesch DU mer vorgläbt, wie wundervoll und wertvoll Läbe esch. Ich verneige mech vor Dir. Du hesch bes zor letschte Sekunde d'Kontrolle gha. Eus tröschtet. Wie hesch das gmacht? I versinke voller Demuet vor Dir uf'd Chnü. För mech hött no unfassbar wie DAS gmacht hesch. S'gett nor ei Erklärig för mech: Dini bedingislosi Liebi för eus. DAS macht nor d'LIEBI. Liebi esch die stärchschti Macht uf Erde. Es esch de unsichtbari Kitt zwösche allem. Zwösche Himmel und Erde. Gränzelos. GOTT.

... und au ig ha i die Gnad vo Dinere bedingslose Liebi dörfe falle. DANKE DIR. 

Was Du Liebs abglieferet hesch - esch ned vo dere Wält gsi. Besch mis grosse Vorbild! Richte mech us nach Dir wie nach emene Kompass. Versueche mis Lächle zrogg z'gwinne. Ig weiss, dass das Din Wunsch esch. Be dra.... . Wott Dech ned enttüsche. Jesus helft mer - so wie ER au Dir gholfe hett ... . 

I dem Sinn umarm ig Dech. Bes mer eus wieder gsänd. Uf Wiederluege min Engel uf Erde.

Ig liebe Dech bes as Endi vo de Wält und drüber us. Bes denne.

mum

Danke dass au ich, wenn au nur churz, dini liebi, fröhlichi Seel ha dörfe kennelere. 

Wirsch in Erinnerig bliebe! 

Du Nadine besch en Engel uf Erde gsi. Jetzt besch zrogg ide Heimat.Wer weiss, was en Engel uf Erde bedüdet - stellt keini Froge meh. Ig (mer) verneige mech (eus) vor Dir. Mer alli wüsse au werom. "Leben … I feel you" e Song vo Schiller. Ned de Krebs hett gsiegt - nei - eusi Liebi för immer.